“3 uşaqla vaqonda yaşayıram, onu da SOCAR əlimdən alır” - Gəmisini partladacağını deyən kapitan/ FOTOLAR

Kapitan BakuPost.az-la əlaqə saxlayaraq Binəqədi rayonu, Biləcəri qəsəbəsi, Yeni Yaşayış Ordubadidə yerləşən evinin Dövlət Neft Şirkətinin Neft Kəmərləri İdarəsi tərəfindən söküləcəyi ilə bağlı bu gün xəbərdarlıq bildirişi aldığını deyib. Qeyd edib ki, SOCAR mətbuata açıqlamasında şirkətə məxsus ərazilərdə tikilən qanunsuz evlərin sökülməsi ilə bağlı hər hansı iş getmədiyini bildirsə də, dəfələrlə onun yaşadığı yeri sökməyə çalışıblar: "Bu səhər gəlib, bildiriş gətiriblər. Bu ərazidə 22 min ev var. Amma yalnız bizim qaldığımız vaqonu yıxmağa çalışırlar. 220 kvadrat metr ərazidir. Torpağın sənədini almışam. İmkanımız olmadığı üçün ev tikə bilməmişik. Vaqonda yaşayırıq. O qədər tikilmiş ev qala-qala mənim vaqonumdan əl çəkmirlər. Bizim də yaşamağa başqa yerimiz yoxdur”.

 

 

E. Qəribov qeyd edib ki, ona bunun qarşılığında hər hansı kompensasiya ödənilmir: "Evi söküb, məni 3 uşaqla küçədə qoyub gedirlər. Hansısa kompensasiya ödənilməyəcək. Uşaqlarımla küçədə qalım? Özü də üçü də məktəbdə oxuyur. Dərslərindən geri qalacaqlar. Deyirəm ki, bu qədər ev var, bircə mənim vaqonumu sökməklə nə olacaq? Deyirlər, onların icazəsi var, sənin yoxdur. Get kimə istəyirsən şikayət et. Xəbərdarlıqda da qeyd olunub ki, bu ərazidə tikinti aparmağa icazə yoxdur. Mən də heç bir tikinti aparmamışam. Vaqonda yaşayıram. Sabah 30-40 nəfər adamla gəlib buranı sökəcəklərini deyiblər. Bilmirəm nə edim. Deyirəm üstümə benzin töküb, yandıracağam, deyirlər, özün bilərsən”.

Kapitan gəmisini partlatmaqla bağlı təhdidindən sonra işdən çıxarılıb-çıxarılmadığını da bilmədiyini deyib.