Ukraynanın Dnepropetrovsk vilayətində azərbaycanlı polis qadının peşəkarlığı dillər əzbəridir.
BakuPost AzərTac-a istinadən xəbər verir ki, Karina Məmməd qızı Əliyeva 1985-ci ildə Krivoy Roq şəhərində anadan olub. Atası azərbaycanlı, anası ukraynalıdır. 2003-cü ildə bu şəhərdə liseyi bitirib, 2008-ci ildə isə Odessa Milli Hüquq Akademiyasında təhsilini qırmızı diplomla başa vurub. Elə həmin ildən Ukraynanın daxili işlər orqanlarında çalışır. İlk iş yeri Krivoy Roq şəhərinin rayon polis bölməsi olub, orada müstəntiq işləyib. 2012-2014-cü illərdə Dnepropetrovsk vilayəti Milli Polis Baş İdarəsində xüsusi işlər üzrə müstəntiq kimi çalışıb. 2014-2017-ci illərdə Dnepr şəhər aeroportunun istintaq şöbəsinin rəisi olub. Hazırda Dnepropetrovsk vilayəti Milli Baş Polis İdarəsinin metropolitendə polis bölməsinin rəisidir.
Karina Əliyeva deyir ki, daxili işlər orqanlarında çalışmaq onun uşaqlıq arzusu olub: "Ona görə də polis orqanlarında istədiyim hədəfə çatmaq üçün həvəslə işləyirəm. Öz peşəmi çox sevirəm. Mülki əhali arasında polisə inam və etimadı artırmaq üçün bütün bacarığımdan istifadə edirəm”.
O bildirir ki, polis geyimində, çiynində poqon gəzdirən qadın olmaq gözəl bir duyğudur. Bu, ətrafdakı insanlara da xoş təsir bağışlayır.
"Bu yerlərdə böyüyüb boya-başa çatmasam da, Azərbaycanın hər bir guşəsi mənim üçün doğma və əzizdir”.