- İstanbuldan FOTOREPORTAJ Yerlə uçan qağayı şəhər

İstanbulun güclü cazibəsi var. O cazibə adamı televiziya və internet üzərindən belə, adamı özünə çəkir. Mən İstanbula getmədən bu şəhərin heyranı olmuşdum. 

 

Şəhərin qəribə sıxlığı var. Sıxlıqdan qədimlik, onunla ahəng olmayan yenilik boylansa da, insan qəribə auraya düşür. İstanbul öz ruhu olan şəhərdir, həmin ruh adamın beyninə və ürəyinə hökm kəsilir. 

 

Şəhərin xüsusi ətri var. Görünür, bu da insanları ona bağlayan səbəblərdəndir. Təbiət şəhərlə vəhdətdədir. Havası İstanbulun ruhuna oxşayır. İstanbul öz təbiətinin ruhunu oxşayır. Dar küçələrin cığırları ilə yürüyərkən özünü təbiətdə, xüsusilə də enişli-yoxuşlu olduğundan dağda yürüyürmüş kimi hiss etməyə başlayırsan ki, küçəyə daxil olan motosiklet, yaxud avtomobil səni bu mistik ab-havadan uzaqlaşdırır.

 

 

Bəyəndiklərim: Dar küçələr və bu küçələrin kəskin eniş-yoxuşu. Qədim evlərin olduğu kimi qorunub saxlanılması, yaşıllığın bolluğu, binaların rəngi, yeməklərin müxtəlif çeşidi, hər büdcəyə uyğun restoran, alış-veriş mərkəzlərinin olması, yerli məhsul sayının çox müxtəlifliyi, nəqliyyatın rəngarəng növləri, xüsusilə müasir tramvayların şəhərin nəqliyyat yükünün böyük hissəsini öz üzərinə götürməsi, metrobus, avtobus, polisin küçələrdə təhlükəsizliyin qorunması üçün silahlı müşahidəsi, bir-birindən gözəl memarlıq abidələrinin, xüsusilə də məscidlərin olması, küçələrdə sahibsiz heyvanların yerli baytarlıq mərkəzləri tərəfindən nömrələnməsi və insanların verdiyi qidalarla sağlam şəkildə yaşamaları, qağayıların çoxluğu və insanlara olan dost münasibəti. 

 

 

İstanbulda olduğum müddətdə daha çox yerli mətbəxdən olan yeməklər daddım və hər birini də çox bəyəndim. Xüsusilə də buradakı günlərimin qidalanma hissəsinə türk pendirləri öz damğasını vurdu, "Qars kaşarı” "Keçi pendiri” "Lor” "Erzincan tulum” və bir neçə yerli pendir növlərindən daddım ki, hər birinin  başqa ləzətti var. Onların içərisində keçi pendirinin xüsusi yeri olduğuna diqqət çəkmək istəyirəm. Səfərimin ilk günü İstiqlal küçəsindəki məşhur Mid Point restoranında daddığım "Keçi pendiri salatı”nın dadı hələ də damağımdadır.