2024-cü ildə Azərbaycan mədəniyyətinin itkiləri - SİYAHI

Bakupost.az bu il vəfat edən mədəniyyət adamlarının siyahısını təqdim edir:

Mövlud Süleymanlı: azərbaycanlı nasir, dramaturq, ssenarist, Azərbaycan Yazıçılar Birliyinin üzvü (1980), Əməkdar incəsənət xadimi (2003), Azərbaycanın xalq yazıçısı (2006). "Şöhrət" və "Şərəf" ordenlərinin laureatı. Mövlud Süleymanlı fevralın 21-də, 81 yaşında vəfat edib. O, "Köç", "Ceviz qurdu", “Şanapipik” kimi məşhur əsərlərin müəllifidir.

Çingiz Hüseynov: nasir, tənqidçi, ədəbiyyatşünas, tərcüməçi, 1959-cu ildən Azərbaycan Yazıçılar Birliyinin üzvü, filologiya elmləri doktoru (1979), professor (1980), Azərbaycan SSR əməkdar incəsənət xadimi (1989). Yazıçı yanvarın 8-də, 84 yaşında vəfat edib. Müəllif "Fətəli Fəthi", "Məhəmməd, Məhəmməd", "Cavad xan" əsərləri ilə məşhurdur.

Namiq Hacıheydərli: Azərbaycan şairi, araşdırmaçı, Azərbaycan Yazıçılar Birliyinin üzvü (2002), AYB-nin Muğan bölməsinin yaradıcısı və ilk sədri (2008–2015). Aprelin 27-də, 48 yaşında dünyasını dəyişib.

Yaqub Əlioğlu: Yazıçı-jurnalist, teatrşünas, ssenarist, kino redaktoru. Oktyabrın 13-də 68 yaşında vəfat edib.

Gülhüseyn Kazımov: Azərbaycan ictimai xadimi, yazıçısı və şairi, filologiya üzrə fəlsəfə doktoru. Feralın 24-də 74 yaşında dünyasını dəyişib.

Aygün Bəylər: Əməkdar artist, müğənni. 48 yaşında olan Aygün Bəylər Türkiyədə müalicə aldığı xəstəxanada xərçəng xəstəliyi səbəbindən yanvarın 6-da 48 yaşında dünyasını dəyişib.

Gülbahar Şükürlü: Əməkdar artist, qarmon ifaçısı. Uzun müddət xərçəng xəstəliyindən əziyyət çəkən Gülbahar Şükürlü yanvarın 5-də 62 yaşında vəfat edib.

Kifayət Gəncəli: Azərbaycanın Əməkdar artisti, xanəndə. Sentyabrın 22-ndə 87 yaşında ürək çatışmazlığı səbəbilə vəfat edib.

Rasi Abdullayev: Azərbaycanın Xalq artisti, violonçel ifaçısı. 1964–1972-ci illərdə Azərbaycan Dövlət Kamera Orkestrinin, 1970–2010-cu illərdə isə Azərbaycan Dövlət Akademik Opera və Balet Teatrının simfonik orkestrində solisti olub. Noyabrın 26-sı 80 yaçında vəfat edib.

Cavanşir Məmmədov: Əməkdar artist, müğənni. 70 yaşında olan Cavanşir Məmmədov aprelin 20-də qəfil ürəktutmadan dünyasını dəyişib.

Şahlar Quliyev: Xalq artisti, opera müğənnisi. 26 oktyabrda 78 yaşında vəfat edib.

Leyla Şəripova: müğənni, bəstəkar, nəğməkar şair, Tacikistan SSR (1965) və Azərbaycan SSR xalq artisti (1977). Fevralın 19-da 94 yaşında dünyasını dəyişib.

Sahibə Əhmədova: Əməkdar artist, aktrisa. Uzun müddət xərçəngdən əziyyət çəkən Sahibə Əhmədova martın 16-sı 68 yaşında dünyasını dəyişib.

Naibə Əlibəyova: Aktrisa. Uzun müddət onkoloji xəstəlikdən əziyyət çəkən Naibə Əlibəyova martın 6-sı 60 yaşında dünyasını dəyişib.

Rafiq İbrahimov: Əməkdar artist, Bakı Bələdiyyə Teatrının aktyoru. Uzun müddət xərçəngdən əziyyət çəkən Rafiq İbrahimov 13 sentyabrda 68 yaşında vəfat edib.

Əlibala Əsgərov: Azərbaycan aktyoru. İyunun 12-si 69 yaşında vəfat edib.

Zemfira Nəcəfova: Əməkdar artist, aktrisa. Avqustun 1-i 74 yaşında dünyasını dəyişib.

Yuri Vladimiroviç Omelçenko: Azərbaycan aktyoru. Azərbaycan Respublikasının əməkdar artisti. Aktyor aprelin 20-ndə 48 yaşında vəfat edib.

Namis Şirməmmədov: Azərbaycanın teatr və kino aktyoru, teatr rejissoru, Sumqayıt Dövlət Dram Teatrının aktyoru. Yanvarın 12-də 65 yaşında vəfat edib

Rahib Əliyev: Azərbaycan teatr və kino aktyoru, Azərbaycan Respublikasının əməkdar artisti (2006). 25 fevralda, 70 yaşında dünyasını dəyişib.

Azər Qurbanov: Azərbaycan aktyoru. 15 martda, 60 yaşında vəfat edib.

Niftulla Əsgərov: aktyor, Azərbaycan Respublikasının Əməkdar artisti. 5 mayda, 75 yaşında dünyasını dəyişib.

Rəfiqə Axundova: Azərbaycan balet artisti, baletmeyster. Azərbaycan SSR xalq artisti (1970). 22 iyunda 85 yaşında vəfat edib.

Rafiq Nəsirov: Azərbaycan Respublikasının Xalq rəssamı. Azərbaycan Respublikası Prezidentinin fərdi təqaüdçüsü (2017). Rəssam avqustun 3-də 77 yaşında vəfat edib.

İsa Məmmədov: Azərbaycanın əməkdar rəssamı. 1 sentyabrda 68 yaşında dünyasını dəyişib.

Əsgər Kərimov: Tanınmış heykəltaraş, rəssam. 29 noyabrda 66 yaşında vəfat edib.

Telman Zeynalov: Azərbaycan heykəltaraşı, Azərbaycan Respublikasının əməkdar incəsənət xadimi (1992) Azərbaycan SSR Dövlət mükafatı laureatı (1978), Azərbaycan Respublikası Prezidentinin fərdi təqaüdçüsü (2002-ci ildən). 14 dekabrda 80 yaşında dünyasını dəyişib.