"Ailələrdə rus dilində danışılması biabırçılıqdır" - Qulu Məhərrəmli

“Uzun illər ərzində bizdə beş dəfə əlifba dəyişikliyi olub və bunların kombinasiyası, müxtəlif dövrlərdə əlifba dəyişikliyi dilin inkişafına xeyli dərəcədə mane olub. Amma müstəqillik dövründə Azərbaycan dövləti bu məsləni həll edib, bizim latın qrafikalı əlifbamız var, Azərbaycan dilinin işləkliyi ən yüksək səviyyədədir, bu dildə saysız-hesabsız media qurumları var, ana dili dövlət dilidir, "Dövlət dili haqqında" qanun, dilin qorunmasıyla bağlı xüsusi tələblər var. Hazırda müstəqillik dövründə Azərbaycan dilinin işlənməsi, normalarının gözlənməsi, qaydalarına əməl olunması ilə bağlı 20-dən çox dövlət sənədi var. Ona görə də dilin işləkliyi hazırda qənaətbəxş səviyyədədir”.

“Bu birinci növbədə dilin statusunun qorunmasıyla, dil daşıyıcılarının bu dilə münasibətiylə bağlıdır. Mətbuatın, televiziyanın dili ilə bağlı həmişə problemlər olub və bu gün də o qabarıq şəkildə hiss olunur. Bu gün əsas narazılıq odur ki, Azərbaycan dilinin statusuna dil daşıyıcıları tərəfindən lazım olan hörmət göstərilmir”.

“İctimai yerlərdə bəzən bu, yolverilməz həddə gəlib çatıb. Özlərini ziyalı, qlamur göstərmək istəyənlər rus və ingilis dilində danışırlar. Bunlar əlbəttə, məyusedici məqamlardır. Yəni biz bu dilin daşıyıcıları olaraq dilin şərəfini, statusunu qorumalıyıq, dilə sevgi, məhəbbət, ehtiramımızı əsirgəməməliyik. Dilə biganəlik cinayətdir”.