Aktauda həlak olan Zaqatala sakinləri dəfn olundu - FOTO / YENİLƏNDİ

Aktau şəhərində aviaqəza zamanı həyatını itirən Zaqatala rayon sakinlərinin nəşləri ailələrinə təhvil verilib.

Bakupost.az APA-a istinadən xəbər verir ki, dekabrın 25-də “Azərbaycan Hava Yolları”na məxsus J2-8243 nömrəli Bakı-Qroznı reysini yerinə yetirən “Embraer 190” təyyarəsinin Qazaxıstanın Aktau şəhəri yaxınlığında baş vermiş qəza nəticəsində həyatını itirənlərdən Zaqatala rayon sakinləri - 1977-ci il təvəllüdlü, Zaqatala rayonu Danaçı kənd sakini Arif Əsəbəli oğlu Carayev, 1990-cı il təvəllüdlü, Zaqatala rayonu Danaçı kənd sakini Hacıibrahim Süleyman oğlu Carayev, 1981-ci il təvəllüdlü, Zaqatala rayonu Danaçı kənd sakini Xizri İsa oğlu Ceerov, 1966-cı il təvəllüdlü, Zaqatala rayonu Höytala kənd sakini Nərminə Salah qızı İdidova və 1996-cı il təvəllüdlü Zaqatala rayonu Moqov kənd sakini İbrahimxəlil Makkaşərif oğlu Kostiyevin nəşləri bu gün rayona gətirilərək ailələrinə təhvil verilib.

Hazırda aviaqəza zamanı həyatını itirənlərlə yaxınlarının vida mərasimi keçirilir. Vida mərasimindən sonra həyatını itirən şəxslər ayrı-ayrılıqda doğulduqları kəndlərin qəbirstanlığında dəfn olunacaqlar.

Qeyd edək ki, Aktauda baş verən aviaqəza zamanı təyyərənin göyərtəsindəki sərnişinlərdən 10 nəfəri Zaqatala rayon sakinləri olub. Bunlardan 5 nəfəri hadisə yerində faciəli şəkildə həyatlarını itiriblər. Aviaqəza zamanı 5 nəfər Zaqatala rayonu Danaçı kənd sakinləri - 2008-ci il təvəllüdlü Səlihət Xizri qızı Ceerova, 1953-cü il təvəllüdlü Nurullah Abdulməcid oğlu Siracov, 1957-ci il təvəllüdlü Müslimət İmamşəfi qızı Siracova, 2007-ci il təvəllüdlü Nizami Füzuli oğlu Cəlilov və 1988-ci il təvəllüdlü Mahir Asadulah oğlu Carayev müxtəlif dərəcəli bədən xəsarətləri alıblar.

****

Aktau şəhərində aviaqəza zamanı həyatını itirən Zaqatala rayon sakinləri doğulduqları kənd qəbirstanlığında dəfn olunublar.