Culani: Bizim hakimiyyət ərəb ölkələrinə təhlükə yaratmır

Bakupost.az xəbər verir ki, bunu onların lideri Əhməd əl-Şaraa (əbu Məhəmməd əl-Culani ləqəbi ilə tanınır) “Asharq al-Awsat” qəzetinə müsahibəsində bildirib.

“Suriya heç bir ərəb və ya körfəz ölkəsinə hücum platformasına çevrilməyəcək və onların narahatlığına səbəb olmayacaq. Bizim Dəməşqdə olmağımız heç kimə təhlükə demək deyil”, - deyə əl-Şaraa bildirib.

O əlavə edib ki, yeni hakimiyyət Suriyanı iqtisadi inkişafın yeni səviyyəsinə çıxarmağa çalışır və əməkdaşlığa sadiqdir.

Onun sözlərinə görə, Dəməşq həm də qonşu Livanla “hörmətli münasibətlər” qurmaq niyyətindədir:

"Biz Livanın daxili işlərinə qarışmaq istəmirik, çünki ölkəmizdə kifayət qədər işimiz var".

Noyabrın sonunda silahlı müxalifət qrupları Suriya ordusunun mövqelərinə qarşı genişmiqyaslı hücuma keçib. Dekabrın 8-də onlar Dəməşqə daxil olublar, Bəşər Əsəd Suriya prezidenti vəzifəsindən istefa verib və ölkəni tərk edib. Dekabrın 10-da İdlib vilayətində Qurtuluş Hökumətinə rəhbərlik edən Məhəmməd əl-Bəşir 2025-ci il martın 1-dək davam edəcək keçid dövrü üçün Suriya Nazirlər Kabinetinin rəhbəri təyin olunduğunu açıqlayıb.