Dələduzların BakıKart fırıldağı: Yeni saxta səhifələr yaradıldı - Açıqlama

Bakupost.az xəbər verir ki, bu səhifələrdə guya 4 manata BakıKart əldə etməklə 6 ay müddətində ictimai nəqliyyatdan limitsiz istifadə etməyin mümkün olduöu bildirilir.

Eyni zamanda elanın mətnində müvafiq link qoyulur və ona keçid etmək tövsiyə olunur. İlk baxışdan təklif cəlbedici olsa da, əslində bu kiberdələduzluğun bir növüdür. Belə ki, müəyyən şəxslər saxta endirim kampaniyaları ilə, həmçinin dövlət qurumlarının adından istifadə etməklə vətəndaşların pulunu ələ keçirməyə çalışırlar

Məsələ ilə bağlı AYNA-dan Bakupost.az -ın bildirilib ki, onların belə bir səyahət paketi mövcud deyil və paylaşılan elan tamamilə dələduzluq xarakteri daşıyır:

“Bu cür məsələlərdə yalnız qurumun rəsmi saytı və rəsmi sosial şəbəkə hesabında verilən məlumatlara əsaslanmaq lazımdır”.

Daxili İşlər Nazirliyinin mətbuat xidmətinin əməkdaşı Nurlan Əliyev Bakupost.az -a açıqlamasında vətəndaşlara dələduzluğun qurbanı olmamaq üçün belə səhifə və paylaşımlara qarşı diqqətli olmağı, tanımadıqları şəxslərə onlayn qaydada ödəniş etməməyi, şəxsi və bank kartı məlumatlarını heç kimlə bölüşməməyi tövsiyə edib:

“Belə hallarla rastlaşdıqda isə Daxili İşlər Nazirliyinin “102” Xidməti-Zəng Mərkəzinə və sosial şəbəkələrdəki səhifələrinə müraciət edə bilərlər”.