Doğuş zamanı əkizlərdən biri oğurlandı

Bakupost.az xəbər verir ki, bu barədə “Mirror” yazır.

Rio-de-Janeyrodan olan əkiz uşaqların anası Ketlin Tavares adi müayinə zamanı yenidən iki uşaq gözlədiyini öyrənib. O, Mariska Ribeiro Bələdiyyə Xəstəxanasında müşahidə altında olarkən vaxtından bir gün əvvəl doğuş edib. Ancaq qadının qohumlarından heç birinin iştirak edə bilmədiyi doğuş zamanı nəsə baş verib. Ketlin yalnız bir körpənin ağladığını eşitdiyini bildirib.

"Məni əməliyyat otağına apardılar və iki dəst paltarı iki körpə arasında bölüşdürməyimi söylədilər. Mənə narkoz verdilər, uzandım, onlardan birinin ağladığını eşitdim və onu üstümə qoydular. Sonra dedilər ki, ikinci uşaq yoxdur. Başqa heç nə demədilər", - deyə qadın xatırlayır.

10-dan çox ultramüayinə əsasında toplanan tibbi hesabata görə, həkimlər iki dölün olduğunu, hər ikisinin sağlam göründüyünü bildiriblər. Həmçinin ötən ilin dekabrında UZİ müayinəsi zamanı iki ürək döyüntüsü qeydə alınıb.

İndi Ketlin yeni doğulmuş qızının qardaşı və ya bacısının başına nə gəldiyini öyrənməyə çalışır. Artıq xəstəxananın direktoru dindirilməyə çağırılıb.