İqtisadçılardan Nazim Baydəmirli ilə bağlı Prezidentə MÜRACİƏT

Sizə müraciət etməkdə məqsədimiz iqtisadçı həmkarımız, iqtisad elmləri doktoru, keçmiş millət vəkili və iş adamı Nazim Bəydəmirlinin həbsdə saxlanılmasından doğan narahatlığımızla bağlıdır.

Nazim müəllim 2023-cü il iyulun 5-də Nərimanov Rayon Məhkəməsinin qərarı ilə həbs edilərək barəsində 4 aylıq həbs-qətimkan tədbiri seçib. Ona qarşı əvvəlcə Cinayət Məcəlləsinin 182.2.4-cü (hədə-qorxu ilə tələb etmə, xeyli miqdarda əmlak əldə etmək məqsədi ilə törədildikdə) maddəsi ilə, sentyabrın 1-də isə 27 il əvvəl, 1996-cı ildə Rusiya Federasiyasının Lipetsk şəhərində kimdənsə hədə-qorxu ilə pul tələb etməsi iddiası ilə Cinayət Məclləsinin 182.2.2 (hədə-qorxu ilə təkrar tələb etmə) maddəsilə ilə yeni ittihamlar irəli sürülüb.

İyulun 10-da Bakı Apellyasiya Məhkəməsi iqtisadçı barəsində həbs-qətimkan tədbiri qərarını qüvvədə saxlayıb.

Vəkilləri, ictimaiyyət nümayəndələri Nazim müəllimin həbsinin ötən il Gədəbəy rayonunun Söyüdlü kəndindəki qızıl mədəni ilə bağlı yerli sakinlərin etirazına diqqətlə yanaşmanın vacibliyini qeyd etməsi ilə əlaqələndirirlər. Axı o özü Gədəbəylidir. Təbii ki, tanınmış ziyalı və iş adamı olduğuna görə biganə qala bilməzdi.

Nazim müəllim həm millət vəkili olduğu dövrdə, həm də sonrakı illərdə ictimai xadim, iş adamı kimi dövlətimizin, cəmiyyətimizin maraqları ilə bağlı olduqca faydalı işlər görüb. O, ictimai çıxışlarında ölkəmizin uğurlarını qeyd etməklə yanaşı, mövcud iqtisadi problemlərin həlli yollarını da həmişə göstərməyə çalışmış, təkliflər vermişdir. Bu da Sizin ölkəmizdə ictimai nəzarətin vacibliyi ilə bağlı çıxışlarınızda qoyulan tələblərə tamamilə uyğundur.

Nazim müəllim, həmçinin biznes fəaliyyətində nümunəvi iş adamlarımızdan biridir. Öz fəaliyyətində qanunçuluğu, şəffaflığı ali dəyər hesab edərək təşviq edib, sahibkarların hüquqi maarifləndirilməsinə çalışıb, vergi intizamına dəvət edib.

Nazim Bəydəmirli hazırda 61 yaşındadır, ömrünün 1 ildən artığını həbsxanada keçirib, səhhətində ciddi problemlər var. Onun barəsində seçilmiş həbs-qətimkan tədbirləri bir neçə dəfə uzadılıb, artıq iki aydan çoxdur məhkəməsi davam etdirilir.

Sizdən xahiş edirik ki, Milli Məclisin keçmiş üzvü, ziyalı, iqtisadçı-alim kimi onun fəaliyyətini, hazırki durumunu nəzərə alaraq, barəsində seçilmiş həbs-qətimkan tədbirinin dəyişdirilməsi, ona qarşı irəli sürülmüş ittihamların ədalətli, şəffaf şəkildə araşdırılmasına yardım edəsiniz.

Əvvəlcədən Sizə minnətdarlığımızı bildiririk.