Livanlılar kütləvi şəkildə qaçır - Ölü və yaralı sayı durmadan artır

Bakupost.az TASS-a istinadən xəbər verir ki, bunu Livanın ətraf mühit naziri Nasser Yasin deyib.

“İsrailin dağıdıcı bombardmanları əhalinin ölkənin cənubundan digər bölgələrinə kütləvi şəkildə köçürülməsinə səbəb olub”, - deyə nazir "Əl-Qahirə Əl-İhbariyə" telekanalınabildirib.

Yasin əlavə edib ki, hökumətin fövqəladə hallar komissiyası "Livanın cənubunda evlərini tərk etməyə məcbur olan insanların təhlükəsizliyini təmin etmək üçün mümkün olan hər şeyi edir".

Telekanal bildirib ki, Livan hakimiyyəti sərhəd bölgəsindən ölkənin içərilərinə doğru gələn livanlıları yerləşdirmək üçün bir neçə məktəb və universitet binalarının ayrılmasını əmr edib.

Günün əvvəlindən İsrail Hərbi Hava Qüvvələri Cənubi Livana kütləvi hücumları davam etdirir. Onların hədəfinin "Hizbullah" şiə təşkilatının hərbi obyektləri olduğu açıqlanıb. İsrail tərəfinin açıqlamalarına görə, zərbələr yəhudi dövlətinin şimal rayonlarını aylardır" Hizbullah" qoşunlarının atəşə tutmasına cavab olaraq həyata keçirilir və bunun nəticəsində on minlərlə israilli sərhəd bölgəsindən təxliyə edilib. İsrail ordusunun son məlumatlarına görə, səhər saatlarından etibarən Livandakı 300-dən çox "Hizbullah" hədəfi hücuma məruz qalıb.

Livan Səhiyyə Nazirliyinin yaydığı məlumata görə, İsrailin hücumu nəticəsində ölkədə ölənlərin sayı 182-ə çatıb, 727 nəfər isə yaralanıb.