"Media savadlılığı özündə mühüm çağırışları ehtiva edir” - Açıqlama

Bunu Bakupost.az -a Bakı Dövlət Universitetinin Jurnalistika fakültəsinin dekanı, Mətbuat Şurası sədrinin müavini Vüqar Zifəroğlu deyib.

Onun sözlərinə görə, bu gün media savadlılığı olduqca ciddi önəm daşıyır. Media savadlılığı insanların media vasitələrindən düzgün istifadə etmək bacarıqlarını əhatə edir.

Vüqar Zivəroğlu qeyd edib ki, bu günün jurnalistləri üçün informasiya savadlılığı çox vacibdir:

"İnformasiya savadlılığı, jurnalistlərin informasiya ilə işləmək, müxtəlif informasiya mənbələrini tapmaq və effektiv istifadə etmək bacarığıdır. Bu bacarığı olan jurnalist asanlıqla doğru məlumatı tapır və onu analitik şəkildə qiymətləndirir”.

Vüqar Zivəroğlunun dediyinə görə, bu gün dünyanın müxtəlif ölkələrində media savadlılığı ilə bağlı fərqli layihələr, proqramlar və s. həyata keçirilir. Azərbaycanda da bu istiqamətdə mühün addımlar atılır.

Millət vəkili Vüqar Rəhimzadə isə bildirib ki, bu gün media savadlılığı özündə mühüm çağırışları ehtiva edir. Bu jurnalistin əldə etdiyi informasiyanın dəqiqliyini araşdırmadan cəmiyyətə təqdim etməsinin mümkünsüzlüyünü ortaya qoyur:

“Media savadlılığının artırılması çox mühüm məsələdir. Jurnalistin dövrün tələblərinə uyğun olaraq daim təkmilləşməsi, inkişaf etməsi vacibdir. Peşəkarlığın artırılması mediada yayılan məlumatın dəqiqliyini, yaxud reallığı əks etdirmədiyini müəyyənləşdirməyə kömək edə bilər”.