Pezeşkian Bakıda nələri müzakirə edəcək?

Bakupost.az xəbər verir ki, bu fikirləri Musavat.com-a şərhində Milli Məclisin deputatı Hikmət Babaoğlu bildirib.

Deputat vurğulayıb ki, Azərbaycanın yanaşması belədir ki, İran yaxın qonşu olduğu kimi, ən yaxın dost və qardaş ölkə olmalıdır:

“Təəssüf ki, İran xarici siyasətində bunu nəzərə almır, üzünü başqa istiqamatlərə tutur ki, bu İranın xarici siyasətini müəyyənləşdirən ideoloji mərkəzlərin mövqeyi əsasında baş tutur. Nəticə etibarilə, hazırkı reallıq onu göstərir ki, bu cür mövqe İrana o qədər də böyük dividentlər qazandırmır. İran xarici siyasətinin prioritetləri son bir neçə ildə özünü doğrultmadı. Azərbaycan prioritetlərdən biri olmalıdır, bu prioritet dostluğa, qardaşlığa əsaslanmalı, ortaq dil və mədəniyyət komponentlərinə söykənməlidir. Belə olarsa, İran Azərbaycanın timsalında dərin strateji müttəfiq qazana bilər və bu tarixi müttəfiqlik ola bilər. Amma xarici siyasətində, təkcə, Cənubi Qafqazda Ermənistanın prioritet seçilməsi İrana heç nə vəd etmir, sadəcə manipulyasiya vəd edir. İranın xarici siyasətində Azərbaycanın prioritet olacağına ümid edirik. İki ölkə arasında bu məsələlər müzakirə edilməlidir. Bu baxımdan iki ölkə başçısının intensiv qarşılıqlı səfərləri yeni reallıqlar yarada, yeni tarixi səhifə aça bilər”.

Deputat vurğulayıb ki, bəzi əsaslar İran-Azərbaycan münasibətlərində müəyyən qədər gərginliklər yaradır:

“Xüsusilə, regional inteqrasiya, Zəngəzur dəhlizi, Ermənistanın aqressiv siyasətinin dəstəklənməsi kimi məsələlər İran-Azərbaycan münasibətlərində gərginliklər yaradır. Bu mövqe bir gündə dəyişməyəcək. Sözsüz ki, İranın xarici siyasətində birdən-birə dəyişiklik olmayacaq. Gərginlik yaradan ikinci məsələ etnik azərbaycanlılarla bağlı məsələlərdir. İran Konstitusiyasında nəzərdə tutulduğu kimi, azərbaycanlıların dil hüquqlarının nəzərə alınmaması, gözardı edilməsi narahatlıq yaradır. Hətta İran prezidenti Məsud Pezeşkianın doğma dilində danışmasının ictimaiyyət tərəfindən qınanması kimi məqam da var. Bütün bu məsələləri bir görüşdə müzakirə etmək, İranın daxili və xarici siyasətində paradiqmal dəyişiklik gözləmək xəyalpərəstlik olardı. Hər bir halda bu məsələlər müzakirə olunmalıdır. Əlbəttə, İran prezidentinin Azərbaycana səfəri tarixi səfər kimi dəyərləndirilə bilər. Hər hansı mövzuda razılaşma əldə olunub-olunmamasından asılı olmayaraq, İranın azərbaycanlı prezidentinin Azərbaycana səfər etməsi və İran xalqı adından səfər etməsi mühüm hadisə ola bilər. Təlatümlü mərhələlərdən keçsə də, İran-Azərbaycan münasibətləri yaxşı olmağa məhkumdur çünki Azərbaycanın İrana qarşı heç bir ərazi yoxdur, İranın da Azərbaycana qarşı ərazi iddiası yoxdur. Belə olan halda, xalqlarımızın ortaq dil bənzərliyi üzərində elə münasibətlər inşa etmək olar ki, hər iki dövlət güclü edə bilər. Düşünürük ki, bu, belə də olacaq”.