Qutsul həbsinin səbəbini açıqladı

Qaqauziyanın rəhbəri Yevgeniya Qutsul Moldova hakimiyyətini siyasi təqibdə ittiham edib. O bildirib ki, həbsi və irəli sürülən ittihamlar onu tutduğu vəzifədən uzaqlaşdırmaq məqsədi daşıyır.

Bakupost.az xəbər verir ki, bu barədə RİA Novosti məlumat yayıb.

Qutsul vəkilləri vasitəsilə yaydığı bəyanatda təqsirinin sübuta yetirilmədiyini vurğulayaraq, cinayət təqibini onu "nüfuzdan salmaq və vəzifədən uzaqlaşdırmaq cəhdi" adlandırıb.

“Bu gün iş üzrə növbəti məhkəmə iclası keçirildi və onun əsl məqsədi ədalət deyil, məni Qaqauziya xalqının verdiyi mandatdan məhrum etməkdir”, - deyə bəyatnatda bildirilir.

Qutsul həbsini “Qaqauziyanın səsini” boğmaq və qaqauz xalqını identikliyindən məhrum etmək cəhdi kimi qiymətləndirib. O, onu dəstəkləyən və siyasi təzyiqlərə qarşı çıxan muxtariyyət sakinlərinə minnətdarlığını bildirib.

Yevgeniya Qutsul martın 25-də axşam saatlarında Moldovanı tərk etməyə cəhd edərkən Kişinyov hava limanında saxlanılıb. Qaqauziyanın rəhbərinin pasportu götürülüb, üzərində axtarış aparılıb və ölkədən uçmasına icazə verilməyib. Siyasətçi daha sonra həbs edilib. O, muxtariyyətdə 2023-cü il seçkiləri üçün seçki fondlarının idarə edilməsi prosedurunu pozmaqda, seçkilərdə “Şor” siyasi partiyasını qanunsuz maliyyələşdirməkdə və saxta sənədlər hazırlamaqda ittiham olunur.