Trampla Zelenski razılığa gəldilər - Detallar açıqlandı

Bakupost.az "RBC-Ukrayna"ya istinadən xəbər verir ki, bu barədə Zelenskinin mətbuat katibi Sergey Nikiforov telemarafonda deyib.

O qeyd edib ki, bu barədə liderlərin telefon danışığı zamanı razılıq əldə olunub. Lakin görüşün tarixi, vaxtı və formatı hələlik məlum deyil. Nikiforov qeyd edib ki, Zelenski ilə Tramp görüş barədə “prinsipcə razılığa gəliblər”.

“Biz bu görüşün baş tuta biləcəyi müəyyən vaxtları müzakirə etdik, lakin onun nə vaxt baş tutacağı haqda indidən danışmaq tezdir. Komandalar işləyəcək və mümkün olduqda qrafikləri və təfərrüatları koordinasiya edəcəklər”, - deyə mətbuat katibi bildirib.

ABŞ prezidentliyinə namizədin Ukraynaya gələ biləcəyi ilə bağlı suala Nikiforov belə cavab verib:

“Bu barədə danışmaq hələ tezdir. Həqiqətən də bunun (görüşün-red.) nə vaxt olması, harada baş verməsi müzakirə olunub, amma konkretliklərdən – həm format, həm vaxt, həm də yer barədə danışmaq çox tezdir”.

Nikiforov qeyd edib ki, Zelenski Trampı Rusiya prezidenti Vladimir Putinin hərəkətlərini izah etməyə və ya hansısa şəkildə əsaslandırmağa çalışan ölkələrin nümayəndələrinə etibar etməməyə çağırıb. Onun sözlərinə görə, Ukrayna prezidenti Trampa Rusiyanın iyulun 19-da Nikolayevə zərbə endirməsi, eləcə də Kiyevdəki "Oxmatdet" uşaq xəstəxanasını atəşə tutması barədə danışıb.

“Tramp deyib ki, onun seçkilərdə qələbəsinin Rusiyaya faydalı ola biləcəyinə dair saxta xəbərlərə inanmamaq lazımdır ”, - Nikiforov əlavə edib.