Turizm Agentliyinin “hökm”ü hazırlanır

Daha sonra məlumat verilib ki, Dövlət Turizm Agentliyi Aparatının əməkdaşı Nicat Hüseynov Dövlət Təhlükəsizliyi Xidməti tərəfindən 04 mart 2025-ci ildə şübhəli şəxs kimi tutulub və məhkəmə qarşısına çıxarılaraq Bakı şəhəri Səbayel Rayon Məhkəməsi tərəfindən barəsində həbs-qətimkan tədbiri seçilib. O, xidməti fəaliyyət zamanı vəzifə səlahiyyətlərindən sui-istifadə etmədə ittiham olunur.

Dövlət Turizm Agentliyində bir müddət əvvəl başlayan yoxlama isə davam edir. Bakupost.az xəbər verir ki, Hesablama Palatasından Modern.az-ın sorğusuna cavab olaraq bildirilib ki, audit prosesi yanvar ayından başlayıb.

Məlumatda deyilir ki, yoxlama prosesi Hesablama Palatasının 6 dekabr 2024-cü il tarixli Kollegiya qərarı ilə təsdiq edilmiş 2025-ci il üçün iş planına əsasən aparılır: "Plana əsasən, cari ilin yanvar ayından başlayaraq Dövlət Turizm Agentliyində dövlət vəsaitlərinin və digər dövlət əmlakının idarə olunmasının auditi keçirilir və “Hesablama Palatası haqqında” Qanunun 22-ci maddəsinə uyğun olaraq hazırda audit prosesi davam edir".

İddialara görə, Dövlət Turizm Agentliyi 103 milyon zərərlə işləyib. Son illər isə agentliyə dövlət büdcəsindən ayrılan vəsaitlərin həcmi ilə turizmin inkişafı sahəsində aparılan işlərə uyğun deyil. Medianın ittiham kimi yazdıqlarının bir məqamı da odur ki, turizmin təbliğatı üçün ayrılan külli miqdarda vəsaitin fonunda Azərbaycana bu ilin yanvar ayında 172 min 653 xarici vətəndaş və vətəndaşlığı olmayan şəxs səfər edib. Bu da cəmisi 4% artım deməkdir. 2025-ci ilin fevral ayında ABŞ-ın “Cable News Network Inc” (CNN) ilə imzalanan 1 milyon 190 min manatlıq müqavilə bu xərclər arasında diqqət çəkən məqamlardan biridir.

Mənbənin bildirdiyinə görə, Hesablama Palatasının tezliklə yoxlamaları başa çatdıracaq və bu, Dövlət Turizm Agentliyinin rəhbərliyinin “hökmü”ndə əsas tutarqa hesab olunacaq. Bundan sonra hüquq-mühafizə orqanları antikorrupsiya tədbirləri çərçivəsində bir sıra həbslər həyata keçirəcək. Hesablama Palatasının hesabatı “hökm” kimi dəyərləndirilə bilərmi?

İqtisadçı Xalid Kərimli mövzu ilə bağlı fikirlərini "Müsavat”la bölüşüb:

“Birinci onu qeyd edim ki, məmurların taleyi, agentliklərin yaradılması ölkə başçısının səlahiyyətində olan məsələdir. İkincisi, Turizm Agentliyinin ziyanla işləməsi də sürpriz deyil. Çünki Dövlət Turizm Agentliyinə verilən hotellərin bir qismi, misal üçün, qış turizm kompleksi də Dövlət Turizm Agentliyinə verilib, o da ilin 9-10 ayı işləmir, ya da çox zəif işləyir. Ona görə də bunların çox böyük xərci var - işçi heyətinin saxlanılması, obyektlər böyükdür, onların da saxlanma xərcləri var. Digər tərəfdən, Turizm Agentliyinin özünün inzibati-bürokratik aparatı var. O ki qaldı Turizm Agentliyi və turizmin inkişafına, əmin deyiləm ki, ölkəmiz turizmin inkişafını istəyir. Hansısa bir agentlik yaratmaqla turizm inkişaf etmir. Onda gərək bir xoşbəxtlik agentliyi də yaradaq, insanlar xoşbəxt olsun. Bu cür məsələlər prezident fərmanları və yaradılmış strukturlardan asılı olmur. Əgər biz turizmi inkişaf etdirmək istəyiriksə, Gürcüstan təcrübəsinə baxmaq kifayət edər. Gürcüstanın təcrübəsini təkrarlaya bilərik. Gürcülər bizdən çox fərqlənmir, bizim kimi tarixləri var, təhsil sistemləri olub və s. Bizim də üstünlüklərimiz var. Amma Gürcüstana gələn turistlərin sayı bizdən üç dəfə çoxdur. Biz bir tərəfdən turizmi bağlayıb, digər tərəfdən turizmi inkişaf etdirmək istəyiriksə, burada Turizm Agentliyinin günahı yoxdur. "Niyə ölkəyə giriş çətindir və bahadır" sualına cavab tapmaq lazımdır. Agentliklərin effektivliyi məsələsinə gəlincə isə ABŞ-da indi aparılan dəyişikliklər örnək ola bilər. Hökumət effektivlik agentliyi yaradıb, qurumları "kəsib" atırlar. Ölkəmizdə də dövlətin iş payı özəl sektordan çoxdur, hər ikisi eyni iş verən qismindədir, bu absurddur. Dövlət ciddi islahatlara getməlidir. Dövlət sektorunda işçi sayı iki dəfə azaldılmalıdır. Necə ki, nəhəng ölkə olan ABŞ indi bunu vacib sayır, Azərbaycanda da imkan verilməməliydi ki, mənasız strukturlar, agentliklər formalaşsın, yalançı iş yerləri formalaşsın. Bunların hamısı ləğv edilməlidir".