Vüqar Rəhimzadə: Novruz qalib, bütövləşən Azərbaycanımız, xalqımız üçün yeni müjdələrin başlanğıcı olacaq

Bakupost.az xəbər verir ki, bu fikirləri Milli Məclisin deputatı Vüqar Rəhimzadə KİV-ə açıqlamasında bildirib.

Millət vəkili qeyd edib ki, Novruz bayramı Azərbaycan xalqının çoxçalarlı incəsənətinin güzgüsü, milli mədəniyyətimizdə sülh, mehriban qonşuluq və tolerantlıq kimi ümumbəşəri dəyərlərə sadiqliyinin tarixi təcəssümüdür. Novruz ümumbəşəri dəyərləri, sülhü və tolerantlığı tərənnüm edən bayramdır. Azərbaycan xalqının milli adət-ənənəsinə görə Novruz bayramında küsülülər barışmalı, qohumlar bir-birini ziyarət edib, bayram süfrələri açmalıdırlar. İnsanlar baharın gəlişi ilə torpağın əkib-becərilməsinə başlayır. Qalib, bütövləşən, yeni dövrə qədəm qoyan Azərbaycanın dinamik inkişafla səciyyələnən müasir həyatı və bütün guşələrini əhatə edən genişmiqyaslı quruculuq-abadlıq işləri Novruz bayramının yeniləşdirici ab-havası ilə həmahəngdir. Beş ildir bayramlarımızı Zəfər ruhunda qeyd edirik. Tarixi Zəfərimizin və suverenliyimizin yaratdığı reallıqlar əsasında azad edilmiş ərazilərimizdə genişmiqyaslı bərpa-quruculuq işləri həyata keçirilir, Qarabağımız və Şərqi Zəngəzurumuz dirçəlir. Xalqımız 30 il bu günün həsrəti ilə yaşadı və əmin idi ki, bu gün gələcək. Dövlət başçısı, Müzəffər Ali Baş Komandan İlham Əliyevin qətiyyəti, Ordumuzun gücü, qüdrəti, xalqımızın birliyi, həmrəyliyi sayəsində azadlığına qovuşan torpaqlarımızda yeni həyat başlayıb. Prezident, Müzəffər Ali Baş Komandan İlham Əliyev tarixi Zəfərimidən ötən dövrdə Novruz bayramını azad edilmiş ərazilərdə qeyd edir və xalqımıza təbrikini bu ünvanlardan çatdırır. 2021-ci ildə Şuşada, 2022-ci ildə Suqovuşanda, 2023-cü ildə Talış kəndində, 2024-cü ildə isə Xankəndi şəhərində Novruz tonqalını alovlandran Prezident İlham Əliyev keçirdiyi hissləri belə ifadə etdi ki, buradan xalqa təbriklərimizi çatdırmaq böyük xoşbəxtlikdir. Biz hamımız İkinci Qarabağ müharibəsindən sonra qürurla yaşayırıq. Biz hamımız fəxr edirik ki, biz özümüz ədaləti bərpa etdik, torpaqlarımızı işğalçılardan azad etdik, öz gücümüzü göstərdik və bundan sonra hər kəs bizimlə hesablaşmalıdır, əks təqdirdə, özü peşman olacaq.

Milli Məclisin deputatı vurğulayıb ki, Novruz artıq ölkəmizə qədəm qoyaraq çərşənbələri ilə Azərbaycan xalqının həyatına sevinc, şadlıq gətirməkdədir. Su, Od və Yel şərşənbələri artıq arxada qalıb. Dördüncü və ilin son ilaxır çərşənbəsi isə Torpaq çərşənbəsi adlanır. Novruz özündə Azərbaycan xalqının tarixini, onun zəngin folklorunu və fəlsəfəsini özündə ehtiva edir. Novruz şənlikləri təkcə Azərbaycanda deyil, soydaşlarımızın yaşadıqları müxtəlif xarici ölkələrdə də geniş qeyd edilir. Bu mərasimlərdə yaranan xoş ünsiyyət onları bir-biri ilə sıx şəkildə bağlayır, hər bir soydaşımızda milli mənlik şüurunu, azərbaycançılıq hisslərini və duyğularını gücləndirir. Novruz bayramı azərbaycanlıları Vətənə, doğma Azərbaycana, milli köklərə daha sıx bağlayır. Bu gün harada yaşamasından asılı olmayaraq hər bir azərbaycanlı sevinclidir, qürurludur. Azad edilmiş torpaqlarımız tarixi sahibinə qovuşduğu üçün artıq xoş günlərini yaşayır. Son bir ildə Şuşa, Xocalı və Cəbrayıl şəhərləri sakinlərinə qovuşub. Ümumilkdə bu sevinci yaşayan şəhərlərimizin sayı 5, kəndlərimiz isə dörddür. Növbəti Novruz bayramında bu sıralamanın daha geniş olacağının şahidinə çevriləcəyik. Dövlət başçısı İlham Əliyev bu ilin əvvəlində yerli televiziya kanallarına müsahibəsində bildirdi ki, bu il üçün planlarımızda daha 20-yə yaxın yaşayış məntəqəsinə keçmiş köçkünləri qaytarmaqdır. O şəhər və kəndlərin adları artıq seçilib, layihələr icra edilir. “Mən müharibə başa çatandan dərhal sonra demişəm ki, biz Qarabağı cənnətə çevirəcəyik. Əslində, onsuz da bura öz təbii quruluşuna, gözəlliyinə görə cənnətdir” söyləyən Prezident İlham Əliyev vurğuladı ki, amma müasir infrastruktur, yaşayış yerləri, iş yerləri, rahatlıq - bura doğrudan da dünyanın ən gözəl yerlərindən birinə çevriləcək.

Millət vəkili bildirib ki, Azərbaycan bayramlarını, əlamətdar günləri hər bir sahədə davamlı uğurları ilə qeyd edir. Ötən Novruzdan bu günədək hansı sahəyə baxsaq uğurlu nəticələri görərik. Azərbaycanın növbəti diplomatik uğurları olan COP29 iqlim konfransı, həmçinin D-8 təşkilatına üzv qəbul edilməsi ölkəmizin uğurlu və gələcəyə hesablanmış siyasətinin təqdimatı oldu. Təbii ki, uğurlarımızı sadalamaqla bitmir. Qarşıda Qarabağlı və Şərqi Zəngəzurlu Azərbaycanı daha möhtəşəm uğurlar gözləyir. Novruz qalib, bütövləşən Azərbaycanımız, xalqımız üçün yeni müjdələrin başlanğıcı olacaq.