Zəlimxan Yaqubun yeni kitabının təqdimatı keçirildi- FOTOLAR

Bu gün "Qanun" Nəşriyyatında Zəlimxan Yaqubun yeni "Seçmə şerlər" kitabının təqdimat mərasimi keçirilib.

Nəşriyyatın direktoru Şahbaz Xuduoğlunun təşkilatçılığı ilə baş tutan tədbirdə şairin ailə üzvləri, dostları, millət vəkilləri, tanınmış ziyalılar və media nümayəndələri iştirak edib.

Bakupost.az xəbər verir ki, poeziya gecəsində öncə tədbirin aparıcısı, tanınmış yazar Şərif Ağayar Zəlimxan Yaqubun Azərbaycan ədəbiyyatına verdiyi töhfələrdən danışıb : "Mənə görə, ədəbiyyat ona görə yaranıb ki, insanlar Zəlimxan Yaqub kimi olsun. Yaxşılıq etməyi özünə borc bilən bir insan idi. Mən sevinirəm ki, o sağ olanda mən bu haqda yazdım. Yazımın da adı belə idi : “Zəlimxan Yaqubun yetimləri” .O, həmin yazını oxudu və gördü ki, biz bu dəyəri bilirik.”

Aşıq Ədalət Dəlidağlı isə onu böyük söz ustadı olmaqla yanaşı, qayğıkeş, həssas insan olmasından söz açıb: “Bu gün biz anadan şair doğulub türk millətinin qan yaddaşında əbədi yaşayacaq böyük şairimiz Zəlimxan Yaqubun poeziya gecəsində toplaşmışıq. Mən o ailənin bir üzvü idim, Zəlimxan müəllim məni heç vaxt unutmadı. Çox diqqətcil və qonaqpərvər insan idi. Ölənəcən qonağını özü qarşılayıb özü yola saldı.”

“Ədəbiyyat” qəzetinin baş redaktoru Azər Turan da mərhum şairlə bağlı xatirələrini bölüşüb:

“Bu yaxınlarda Zəlimxan müəllimin oğlu Bəhlulun müsahibəsini oxudum. Ona sual verdilər ki, Zəlimxan müəllimin ən yaxın dostları kim idi? O da cavabında dostlarının adlarını sadaladı. Mən həmin siyahıda adımı görüb vəcdə gəldim. Həqiqətən də biz çox yaxın dost olmuşuq. Onunla Azərbaycanın hər yerini qarış-qarış gəzmişik. Bir dəfə də 74 şairin iştirak elədiyi bir tədbirə getdik. Orda türk poeziyasının tanınmış siması, türk şeirlərinin “Ağ Qartalı” adlandırılan 80 yaşlı Bəhəddin Qaraqoç səhnədə Zəlimxan müəllimə səslənib ona hörmətini bildirdi. Dedi ki, “Mən səni çox aradım, çox izlədim. İzn ver, əllərindən öpüm.” Bu, Zəlimxan Yaqubun Türk dünyasında necə böyük nüfuza sahib olduğunu göstərdi.”

"Ulduz" Jurnalının baş redaktoru Elçin Hüseynbəyli isəTanrının ona verdiyi böyük görəvindən bəhs edib: "

"Zəlimxan Yaqubun bir missiyası vardı, yazmaq! Xəstə vaxtı o özü etiraf eləmişdi ki, bəlkə də deputatlıq ona lazım deyildi, çünki Tanrı ona yalnız yazmaq missiyasını tapşırmışdı.”

Millət vəkili Elnarə Akimova Zəlimxan Yaqubun yaradıcılığında bütöv Azərbaycanın əks olunduğunu bildirib: "Zəlimxan müəllimin əsərlərində Türk dünyasının bütün rəngləri görünür. 90-cı illərdən sonra Qarabağ dərdi onun poeziyasına fərqli nəfəs verdi və o, Xocalı ilə bağlı yazılmış ən gözəl əsərini - "O qızın göz yaşları”nı yazdı. Zəlimxan Yaqubu heç tanımayanlar onun kitablarından şairin obrazını görəcəklər. Yeni nəsil bunları görəcək. “

Deputat Ceyhun Məmmədov da mərhum şairin insanlara yardımsevər, xeyirxah münasibətindən danışıb:

“O bütün fəaliyyəti boyu öz ətrafına, dostlarına dəstək və diqqətini əsirgəmədi. Prlamentdə olduğu müddətdə də xeyirxah münasibəti ilə böyük insan olduğunu göstərdi. Neçə adama ev iş verilməsində rolu oldu".

Ceyhun Məmmədov eləcə də tədbirin təşkilatçılığı ilə bağlı "Qanun" Nəşriyyatına təşəkkürünü çatdırıb: "Sevinirəm ki, “Qanun” Nəşriyyatı tək kitab nəşrinə yox, yaradıcılığa da önəm verir .”

Qiraət ustası Ağalar Bəylərovsa Zəlimxan Yaqub haqda danışarkən göz yaşlarını saxlaya bilməyib:

“Onun ölümü dostlarının belini qırdı, eləcə də mənim. Biz onunla sözün böyük mənasında dost olmuşuq. Təbliğata ehtiyacı olmayan şair idi. Həmişə deyirdi, "qalın kitabın yox, qalan kitabın olsun”".

Daha sonra tədbirdə şairin həyat və yaradıcılığı ilə bağlı videoçarx nümayiş etdirilib.

Davamında 6 nömrəli Laçın məktəbinin şagirdləri, M Teatrının aktrisası Ayan Kamran Zəlimxan Yaqubun şeirlərini səsləndiriblər.

Tədbirin sonunda Zəlimxan Yaqubun oğlu Bəhlul Yaqubov çıxış edərək atasının xatirəsini yaşadanlara və “Qanun” Nəşriyyatına təşəkkür edib.