Qalmaqallı hakimin oğlu dələduzluğa görə dindirilib - YENİLƏNİB

Bakupost.az xəbər verir ki, həbsin səbəbi Anar Alim oğlu Namazovun uzun illər ayrı-ayrı əlil şəxslərin adından sui-istifadə etməsi olub.

Məlumata görə, Anar Namazov fiziki imkanları məhdud şəxsləri aldadaraq, onların adına MMC-lər yaradıb və portala daxil edərək, dövlətdən yardımlar alıb, paralel olaraq, vergidən yayınmaq üçün MMC-ləri qısa müddət ərzində ləğv edib. Beləliklə, bir-birinin ardınca yaranıb-bağlanan bu qurumlar vasitəsilə külli miqdarda gəlir əldə edib.

Anar Namazov və şəbəkəsi növbəti belə bir “əməliyyat” zamanı yaxalanıb. Belə ki, bu dəfə şəbəkə fiziki qüsurlu olmayan şəxslərin adından əlil kimi istifadə etməyə çalışıb. Bir neçə əməliyyatdan sonra isə saxta qurumlar ləğv edilib, ancaq onların vergi borcu qalıb. Onlarla şəxsə külli miqdarda vergi borcu haqda bildiriş gələndə isə şikayətlər başlayıb. Zərərçəkmişlər heç bir qurum yaratmadıqları, hər hansı əməliyyat aparmadıqları halda vergi borcunun necə yaranmasına aydınlıq gətirilməsini istəyiblər.

Hüquq-mühafizə orqanları zərərçəkənlərin şikayəti əsasında araşdırmaya başlayıb və şəbəkənin izinə düşməyi bacarıb. Onların insanların şəxsi məlumatlarını necə əldə etdikləri və fəaliyyətləri hazırda araşdırma predmetidir.

İstintaq orqanlarının A.Namazov barəsində həbs qətimkan tədbirinin seçilməsi üçün məhkəməyə müraciət edəcəyi gözlənilir.

***

Anar Namazov haqqında yayılan xəbər ilə bağlı redaksiyamızla əlaqə saxlayıb və bildirib ki, o, həbs olunmayıb, azadlıqdadı. Lakin barəsində belə bir şikayətin olduğunu təsdiqləyib:

"Sadəcə haqqımda olan şikayət şişirdilib. Həmin adamların öz səhlənkarlığı ucbatından vergi borcları yığılıb. Düzdür, mən onlara kömək etmək istədiyimi demişəm, amma bunu bacarmamışam. Məsələ ilə bağlı "Bandotel"ə dəvət olunmuşam, ərizəm alınıb və sərbəst buraxılmışam".